Rangeela VP aur Rangeeli Secretary: Khoja Community me Gay wedding

Kuch mahino pehle khabar aati hai ki humare shahar ke VP sahab ke ladke ki shadi me naach gana hota hai aur uske photos / videos social media par viral ho jaate hai. Log is harkat ko condemn karte hai lekin VP sahab aur unki DiVision team ise personal life ka matter bata kar logo ko shant kar dete hai.

Read More

Khawarij ideology ne Imam ALI (as) ki jaan li

Imam Ali (as),  k jinhone jung e Siffeen k maidan me dushman ki eit baja dee thi unhe khawaarij ideology ne peeche hatne per majboor kar diya aur yehi ideology unke qatl ka b sabab bani.

Khwaarij ideology dushman se zyada nuksaan deh hai.

Jo kaam dushman na kar saka (Imam Ali (a) ka qatl) wo is ideology k maanne waalo k zariye hua.

Khwaarij wo tola tha jo na muaviya ko sahi maanta tha na Maula Ali (a) ko.

Khawaarij muaviya k bhi dushman the aur Ali (a) k bhi, unhe to bas apni tilawat o munajaat per fakhr tha aur kehte k ye dono galat aur hum sahi aur humme se har ek qaari e Quran hai yaani deen hume in dono (muawiya aur Ali a.) se behtar pata hai.

Ye ajeeb ideology aaj humaare muashre me b maujood hai.

Jo dushman k kaam ko asaan kar deti hai hatta dushman se zyada khatarnaak saabit hoti hai.

Hum me aise bohot log mil jaenge jinka ye nazariya hai k maraje ki mukhalifat Karne waale b galat aur maraje ki pairwi karne waale b galat aur hum hi hai jo deen ka behtareen ilm rakhne waale hai.

Inko chahiye k fursat se dono ki taalimaat ko dekhe padhe aur samjhe k kaunsi raah Hukumat e Imam Mahdi (atfs) se qareeb hai. Khawaarijo ki tarah confuse hokar Ali se jung karke muawiya ko support na kare.

Khudaya hume haq o baatil ki pehchaan karne ki taufeeq ataa farma.

Read More

Kya Ali aaj bhi tanha hai?

1400 baras beet gae..
Kya Ali aaj bhi tanha hai?

Dushman raahe Ali (a) me mushkilaat paida kar raha tha; lekin duniya wale Ali (a) ko madad karne ki jagah Ali (a) par shak karne me lage the.

Ali (a) akele tanha the.

Ali (a) ki apne Dushmano se jo jang thi,
wo sachchai aur haq ki jang thi, batil ke muqable me. Duniya walo ne haq par apni khwahishon ko zyada tarjeeh di aur Ali par shak kiya.

Ali akele tanha the.

Dushmano ne Ali (a) ke muqable me har fard ko jama kiya. Ya to Ali (a) se ladne ke liye ya to Ali (a) se dur rehne ke liye. Haq saaf nazar aa raha tha.. lekin duniya parasto ne Haq ko nahi pehchana aur Ali (a) ko akele chhod diya.

Ali (a) akele tanha the.

Kya aaj ham nahi dekh rahe.. duniya wale phir se giroh dar giroh jamat bandi kar rahe hai. Ali (a) ke chahne wale bande jiska naam bhi Ali (Syed Ali Khamenei) hai uske khilaaf safbandi ho rahi hai lekin phir bhi duniya parast log is Ali par bhi shak kar rahe hai aur ise Dushman ke saamne tanha chhod kar bhag rahe hai.

Kya Ali aaj bhi tanha hai?

Waqt sabhi bhagne walo se sawaal kar raha hai.

Waqt un logo ko bhagne walo ke saamne namuna aur misaal bana kar saamne rakh raha hai jinhone Ali (a) ka saath diya aur apni jaane Ali (a) ke saath milkar Dushman ke khilaaf ladte hue qurbaan kar di aur shaheed ho gae.

Unka naam aaj bhi zinda hai aur Allah ne unhe azeem maqam ata farmaya.

Jin logo ne apni jaan bachai aur Ali (a) ko tanha chhod diya.. wo zaleel hue aur waqt ne unse har tarha ki nemat chhin li.

Ali (a) ko tanha chhodne wale kamyaab nahi hue.

Lekin phir bhi Ali aaj bhi tanha hai.

Aaj hamare saamne waqt phir se khada hai. Ali (a) ka chahne wala Syed Ali Khamenei Dushmano se lad raha hai aur akela khada hai. Hamare saamne wale us par lanat malamat kar rahe hai. Hum kya kar rahe hai?

Kya Ali aaj tanha hai?

Hamare hote hue Ali tanha nahi reh sakte.. apni awaaz buland kare aur har tarah se apne zamane ke Ali ka saath de aur sabit kare...

HAM KUFE WALE NAHI HAI
ALI AAJ TANHA NAHI HAI.

Read More

Rangeele VP ka iftar time

Rangeele VP sahab ki committee saare Hindustan bahot se reasons se mashhur hai, unme se ek hai deeni masael me beja dakhal andaazi.

Team DiVision ka kaam tha ki jamat ke logo ki pareshaniyo ko sunte aur use dur karte, lekin lagata hai baat kuch aage badh gai hai.

Hawaza e Ilmiya Qom se padhe hue Olemao par pabandi lagane ke baad apni manmaani karte hue Rangeele VP sahab ki team ne Furu e Deen me dusre number par aane wale Roze ke iftar aur sehar ke time me fer badal kar diya.

Olema hazraat ki committee ko contact kiye baghair ye deeni faisla qaum ke liye gale se utarna thoda bhari pad raha hai. Log hairan hai ki suraj to usi waqt nikal raha hai aur gurub ho raha hai, lekin iftar aur sehar ka waqt kaise badal diya gaya.

Apne qadam ko explain karte hue har baar ki tarah is baar bhi team DiVision ne what's app ka sahara kiya jisme usi Qom Muqaddas ki ek tanzeem ki research ko pesh kiya gaya jis Qom se padh kar aae Olemao par pabandiya lagai gai thi.

Qaum me batware ke dar se Olemao ne is faisle ki mukhalifat karna sahi nahi samjha.

Lekin sawal ye uthta hai ki kya us VP ki team ko, jisne apne ladke ki shadi me dance party rakhi thi, deeni mamle me dakhal dene ka itna haq hai ki Olemao se consult kiye baghair Iftar aur Sehri ke waqt me tabdeeli le aae?

Read More

Kya ab bhi "Shia People's Party" ko baki rehne ka haq hai?

"Qaumi Halaat" ki pehel jisme "Shia People's Party" ki deeni haisiyat aur Qaum ka naame le kar raajneti karne ke parda fash karne ke jawab me Political Party ke Sadr ke dhada-dhad do teen poster messages aa gae, jin me Sadr sahab ne kahi challenge diya aur kahi gali galoch par utar aae.

Shia Qaum ka aqdar raha hai ki wo kabhi apni Akhlaqi boundaries cross nahi karti. Agar opposition wala na-zeba alfaz istemal kare ya hata-paai par utar aae, phir bhi Akhlaq ki had me rehna Aaimmah (a) se hamne sikha hai. Jung us waqt tak lazmi nahi jab tak dushman deen par hamla na kar de aur ye jung aaj ke ghaibat e Imam (a) ke zamane me mujtahid ki ijazat ke bagair jayaz nahi.

Sadr sahab ko ye samajhna chahiye ki gali galoch karna  aur awaam ke logo par ochi aur gandi galiya dena aur qaum ki namus (aurto) tak ko nahi chhodna, ye sahi tariqa nahi hai. 

Sawal ye uthta hai ki Sadr sahab apne upar uthae gae sawalo se itna pareshan kyu hai?

Kaam par sawal uthae jaane walo se pareshan hone ka matlab hai aap ka kaam mazboot nahi hai. Aap khud hi is sawal ka jawaab dijiye: 

• Kya paise le kar Qaum ke logo ke liye Railway ki ticket book karna sabse aham kaam baqi rah gaya hai?
• Kai saalo se momenin har saal 15 Shaban ko "Gateway of India" par ja kar nazr ka ehtemam karte hai; Siyasi taur par us jalse ko apne naam par le lena qaum ka kaam hai?

Ye aam faham ki baat hai ki jo Sadr sahab Siyasi Partiyo ke photos Shia Qaum ke naam ke saath dhadalle ke saath lagate firte hai; kya wo deen ke dard ke saath kaam kar rahe hai ya siyasi faaeda uthane ke liye kaam kar rahe hai? Waise dilo ke raaz ka ilm sirf Allah (SWT) ko hi hai.

• Kisne Sadr sahab ko haq diya hai ki Qaum ka naam istemaal kar ke Siyasi partiyo ki himayat kare? 
• Kya sadr sahab ne Shia qaum se is baat ki ijazat li hai? 
• Kya Shia Olema Sadr sahab ke is faisle ke saath hai? Kya Shia Qaum ke bade idaare is baat se razi hai ki jis shaks ne 1991 ke dango me Musalmano ko shadeed nuksan pahuchaya tha, jisme Shia Qaum ke bhi ghar jale the aur bahot nuksan hua tha, uska photo Shia Qaum ke naam ke saath lagae jaane par unhe koi aapatti nahi hai?

Sadr sahab! Baat samjhiye. Koi aap ka mukhalif nahi hoga agar aap:

• Qaum ke logo, idaro aur Olemao ki taeed hasil kare
• Hasil ki hui taeed ko Siyasi mafaad ke liye istemaal na kare
• Kisi khas party aur sanghatan ki khul kar taeed na kare
• Kisi vyakti vishesh ki photo Shia Qaum ke banner tale na lagae
• Qaum ke liye development ka kaam kare
• Qaum me education upliftment ka kaam kare
• Qaum ke logo ke liye Railway tickets ka arrangement kare
• Qaum ke logo ke bich ekjahti aur ittehad qayam kare

Lekin yaad rakhiye! agar aap in me se sab kaam karne ke saath saath Siyasi Partiyo ki chatugiri karte rahege aur sawaal uthane walo ko khuli aam gandi gandi galiya dete rahege to Aap ek Shia hone ka haq ada nahi kar rahe hai.

Tehrir: Abbas Hindi

Read More